Amerika 1
S erscht Mol alli Luett fuer es Johr verabschiide, woni gaern han und wo mini taeglichi Umgebig gsi sind, s erscht Mol gfloge, s erscht Mol so richtig witt ewaeg vo Deheime sii, s erscht Mol Heimweh…
Amerika, Usslandjohr – Vor 7 Taeg isch das s Wort gsi, wo mis negschte Johr beschriibe het. Langsam ischs Wirklichkeit worde.
Sitt am 26. Juli bin i in NY am e vorbereitigs Camp, won i mit lutter andere angehende Usstuschschueler no 10 Taag han, bevors denn wirkli ab ind Gaschfamilie und ins High School laebe goht.
Es isch wien en Insle. Es hett immer no Luett um di umme wo dini Muettersproch rede, und trotzdaem muesch die ganz Zitt widr Aenglisch schnurre. Mer redet ueber s negschte Johr, ohni dass mer wirkli weiss was chunt. Me hett eigentlich alles nur mol vomene andere Usstuschschueler ghoert, und vrzellt becho. Und trotzdemm es isch alles scho fascht griffbar. E wirklich sonderbari Situation.
Was i do ueberhaupt nid mag, isch s Aesse, wo me zum Teil eifach nid chan aesse. ZB „Bagels“, amerikanischi „Broetli“ (gsehnt uss wie Donughts) wo irgendwie nach nuett schmecke, will si kei Salz dinne haend, und wo irgendwie doch nach oebbis schmecke, abr oebbis wo fuer mi haesslich und seeeehr ungwohnt schmeckt. Dass s Zueg ungsalze isch, isch sowiesoo oebbis wo s Aesse allgemein ansich het.
Was au schlimm isch sind d Strosse, huett haemer dr zweit Tag in NY kha, und mer sind mit eme Schuelbus ins Zentrum gfahre.
Mer soett eifach jo nid uff d Idee cho, dass es e gemuetlichi Busfahrt isch – nei, mer chan chum oebis mache, 1. will die do eso Auto fahre, wie suscht niene und 2. will d Strosse sonigi Buckel haend, dass de maengisch sogar 20 cm uffegspickt wirsch. I hoff eifach i muess nid eso ind Schuel…
Und s letschte wo mega doof isch, sind die amerikanische Taschtature. Langsam han i mi draa gwoehnt, abr dass i keini „aes“, „oes“ und „ues“ chan schriibe, find i zimli gemein…Das macht grad iiversuechtig wenn ihr do seeleruhig wie gwohnt am schriibe sind…
Abr jo, that’s life…
Geschter isch s erscht Mol oebbis gloffe, wo einigermasse Spass gmacht het – Sightseeing in NY.
Zerscht simmer 3h uff em Schiff gsi und rund um Long Island gfahre…
…3h sind zwar chli uebertriibe gsi, abr drfuer haemmer waerend 3h nid muesse ummelatsche und das isch immer guet… s einzige wo gnaervt het isch dae Typ gsi, wo dr die ganzi Zitt d Oohre vollgredet het, waerenddem de voll gmerkt hesch, dass alles uswaendig glert gsi isch…
nochhaer ischs denn wittergange mit Bus fahre. 2h in Manhatten und denn widr heim. Huette isch denn no s Dakota Huus (doert wo dr J. Lennon glaebt het und drvor vrschosse worde isch), s Daenkmol drvo im Central Park und Lunch im Hard Rock Cafe aagseit gsi.
Nachher haemmer denn no choenne go shoppe, abr das isch oebbis won i nid bsunders gaern mach.
Me hett eifach muesse feschtstelle, dass es rund um e Times Square, oebbe an jedem Egge ae Souvenir Shop het, und dass NY (mindeschtens derte) stinkt (und das uff en Art, terrible). Nach em Central Parc het mini Digi Cam leider dr Geischt uffgee, so dass i do halt keini Foeteli me han… :-/
So, i glaub i hoer jetzt uff, mega langi Blogs z produziere, apropos, Longneck, i glaub es waer guet, wenn de irgend e moeglichkeit wuerdisch finde, eso langi Blogs choenne als churzi Blogs darstelle z lo, so dass me nid immer alles muess scrolle, wenn me die letschte 5 aaluegt…
Longneck
wäge ä ö ü: drugg uf dr tastatur „ALT“ taste abe und denn gisch uf em nummereblock rechts jewiels de ascii code für s entsprächende sonderzeiche i.
ä: 132
ö: 148
ü: 129
Longneck
@megalange blogs: kei problem! bisch die ersti, wo sich mol so öppis getraut het, bzw sich mol richtig müeh gäh het für e lange blog… schad dass de willsch ufhöre 🙁
weblogs sin jo eigentlich webtagebüecher.
ok, das mit dr übersicht chani mol luege wie ich das mach. kei schlechti idee stimmt.
Longneck
so, isch jetzt gmacht. zfriede?
Foxie
jo, super, messi fuer d ascii code, abr funze die au eso uff mac? hans jetzt naemli grad vrsuecht und es goht irgendwie nid :-(((
hey, i woett uebrhaupt nid uffhoere, glaub mers es tuet guet, so richtig choenne z schriibe, was eim uff em haerze ligt, und im momaent isch das zimli vill…
i fuehl mi in dem camp zb nid grad sehr wohl – es het niemer mit daemm i emol ueber zueg chan rede wo mi interessiert. fuer das chum i abr drfuer im momaent gaern uff dis weblog, das isch im momanet so zimli mi rettigsanker, ohni das – i glaub i waer zimli vill oefter am traene vrgiesse, als is jetzt scho mach
und waege de mega lange blogs: es isch eifach eso, dass me oft moll so schnaell schnaell chunt cho luege, oeb widr oeber oebbis postet het, und wenn denn eso mega langi blogs do sind, denn wirds zimli muehsam zum aaluege, dorum au dae vorschlag…
MrWatch
Es wird jetzt abr eifach alles kürzt. Vorschlag: ab ere bestimmte Längi kürze.
Longneck
ascii-mac: ha selber chli umegooglet, aber nüt gfunde wo mit tastekombinatione würd goh. klick eifach obe rechts neb dr uhr uf d fahne, dört „zeichenpalette einblenden“ und denn chasch sonderzeiche direkt mit dr muus umekopiere.
wenn das fähnli nid azeigt wird: Systemeinstellungen -> Landeseinstellungen -> Tastaturmenu -> In menüleiste anzeigen.
guet! guet dass de nid willsch ufhöre! dir tuets guet, und mir erfahre bitz meh über amis ohni verfälschig durch medie. usserdäm haltet das s weblog am lääbe – platz hämmer no massig! und wenn s mol sött knapp werde, ziehni mer eifach s grössere abo…
tja, au das problem isch jetzt glöst. wenns dr immer no z lang isch chasch optional chasch notürlich no bilder oder au text verstecke. (menü „logged in“).
Longneck
nöönöö, MrWatch, es wird eifach immer nur dr ersti abschnitt aazeigt, und e link uf detailsite. wenn de text nur ei abschnitt het, entfallt dr link. also eifach nie enter drucke 😉
Foxie
aso, i finds super äso
jeh, messi für de pfad, wenns ganze system in dütsch gsi wär, denn hättis au sälber gschafft, abr uff änglisch isch es eifach nid gnaz eso easy…
ha widr emol zimli vill muesse rote 😉
Wi!!iam Wa!!ace
@keini „aes“, „oes“ und „ues“ chan schriibe: so isches mir in canada au gange aber ich has zum glück nur miesse 3 wuche ertrage 😛
apropos Bagles ich find sie guet wenn du die dinger mit „gsalzeni butter yschmirsch“, denn schmecke die dinger plötzlich widr guet. Ich bruch jo normalerwies kei gsalzeni butter aber die chasch bruche für die dinger 😉